عمران خان کی ذاتی معالجین سے طبی معائنے کی اجازت کی درخواست

پاکستان تحریک انصاف کے بانی عمران خان نے اپنے ذاتی معالجین سے طبی معائنے کے لیے اسلام آباد ہائیکورٹ میں درخواست دائر کر دی ہے۔

یہ درخواست عمران خان کی جانب سے اڈیالہ جیل میں قید کے دوران اپنے معالجین سے طبی معائنے کی اجازت حاصل کرنے کے لیے دی گئی ہے۔ درخواست بیرسٹر سلمان صفدر اور خالد یوسف چوہدری کے توسط سے دائر کی گئی، جس میں مطالبہ کیا گیا ہے کہ عمران خان کو ان کے ذاتی ڈاکٹروں سے معائنہ کروانے کی اجازت دی جائے۔

درخواست میں مؤقف اپنایا گیا ہے کہ عمران خان کے ذاتی معالجین، جن میں ڈاکٹر عاصم یوسف، ڈاکٹر فیصل سلطان اور ڈاکٹر ثمینہ نیازی شامل ہیں، ان کی میڈیکل ہسٹری سے بخوبی واقف ہیں۔ تاہم، 15 اکتوبر کو ڈاکٹر عاصم یوسف کو عمران خان تک رسائی نہیں دی گئی، جو ان کی صحت کے لیے تشویش کا باعث ہے۔

درخواست میں عدالت سے استدعا کی گئی ہے کہ ان معالجین کو فوری طور پر جیل میں عمران خان کا طبی معائنہ کرنے کی اجازت دی جائے تاکہ ان کی صحت کی نگرانی جاری رہ سکے اور کسی بھی ممکنہ صحت کے مسئلے سے بروقت نمٹا جا سکے۔