آج ہم آپ کو ایک سبق آموز کہانی سنانے جا رہے ہیں، جس کا نام "کتا اور ہڈی کی کہانی” ہے۔ یہ کہانی ایک ایسے کتے کے بارے میں ہے جو اپنی لالچی فطرت کی وجہ سے سب کچھ کھو بیٹھتا ہے۔اسی لئے کہتے ہیں کہ "لالچ بری بلا ہے” اور یہ کہانی اسی حقیقت کو بیان کرتی ہے۔ تو چلیں کہانی شروع کرتے ہیں
اور یہ "لالچی کتے کی کہانی" ہمیں سکھاتی ہے کہ زیادہ کی خواہش اکثر ہمیں سب کچھ کھو دینے پر مجبور کر دیتی ہے۔ اگر ہم شکر گزار بنیں اور جو کچھ ہمارے پاس ہے، اس پر قناعت کریں، تو زندگی میں خوشی اور اطمینان حاصل کر سکتے ہیں۔
ایک گاؤں کے کنارے ایک نہر بہتی تھی، جس کے قریب ایک جنگل تھا۔ اس جنگل میں کئی جانور رہتے تھے، جن میں ایک کتا بھی شامل تھا۔ یہ کتا بہت چالاک مگر بےحد لالچی تھا۔ ہمیشہ زیادہ کھانے کی فکر میں رہتا اور دوسروں کی چیزوں پر نظر رکھتا۔ کھانے کے معاملے میں کبھی کسی کے ساتھ کچھ بانٹنے کا سوچتا بھی نہیں تھا۔
ایک دن یہ کتا بہت بھوکا تھا۔ جنگل میں گھومتا رہا لیکن کہیں بھی کھانے کے لیے کچھ نہ ملا۔ آخر کار، وہ ایک قصبے کی طرف گیا جہاں گوشت کی دکانیں تھیں۔ وہاں جا کر ایک دکان کے باہر کھڑا ہو گیا اور انتظار کرنے لگا کہ کوئی گوشت گرے تو وہ جھپٹ کر لے لے۔ کچھ دیر بعد قصائی نے ایک ہڈی گوشت کے ٹکڑے سمیت باہر پھینکی۔ جیسے ہی ہڈی گری، کتے نے فوراً اسے اٹھا لیا اور خوشی خوشی وہاں سے بھاگ نکلا۔
کتے نے سوچا کہ وہ اس گوشت کو کسی محفوظ جگہ پر بیٹھ کر آرام سے کھائے گا تاکہ کوئی دوسرا جانور اس سے چھین نہ لے۔ وہ دوڑتا ہوا نہر کی طرف گیا، کیونکہ اسے معلوم تھا کہ وہاں کوئی اسے تنگ نہیں کرے گا۔ نہر کے کنارے پہنچ کر جب وہ ایک پل پر چڑھا تو نیچے بہتے پانی میں اسے اپنی ہی پرچھائیں نظر آئی۔
کتے کو لگا کہ نہر کے پانی میں کوئی دوسرا کتا بھی ہڈی لیے کھڑا ہے۔ جیسے ہی اس کی نظر پانی میں پڑی، اس کے دل میں لالچ آگیا۔ اس نے سوچا، "یہ دوسرا کتا بھی گوشت لیے کھڑا ہے، اگر میں اس پر بھونکوں تو شاید وہ اپنا گوشت گرا دے اور مجھے ایک اور ہڈی مل جائے۔”
یہ سوچ کر اس نے زور سے بھونکنے کے لیے منہ کھولا، لیکن جیسے ہی اس نے اپنا منہ کھولا، اس کے منہ سے گوشت پانی میں گر گیا۔ پانی کے تیز بہاؤ نے گوشت کو فوراً بہا دیا اور کتا ہکا بکا کھڑا دیکھتا رہ گیا۔ اب نہ تو اس کے پاس اپنی ہڈی تھی اور نہ ہی اسے دوسرا گوشت مل سکا۔
کتے کو اپنی لالچ پر بہت افسوس ہوا، لیکن اب کچھ نہیں ہو سکتا تھا۔ خالی پیٹ اور مایوس ہو کر وہ واپس جنگل کی طرف چل پڑا۔ اس دن اسے یہ سبق ملا کہ لالچ ہمیشہ نقصان پہنچاتا ہے اور دوسروں کی چیزوں پر نظر رکھنے سے آدمی اپنا ہی نقصان کر بیٹھتا ہے۔
سبق:
لالچی کتا کہانی ہمیں یہ سکھاتی ہے کہ لالچ بری بلا ہے، جو ہمیشہ نقصان کا باعث بنتی ہے۔ جو چیز ہمارے پاس ہے، ہمیں اسی پر قناعت کرنی چاہیے اور دوسروں کی چیزوں پر نظر نہیں رکھنی چاہیے۔ سچی خوشی اور کامیابی اسی میں ہے کہ ہم جو کچھ رکھتے ہیں، اس کی قدر کریں اور شکر گزار رہیں۔
