سکول میں منعقد ہونے والی تقریب جشن آزادی کی روداد لکھیں

14 اگست پاکستان کی آزادی کا دن ہے، جو ہر سال جوش و خروش سے منایا جاتا ہے۔ اس دن کی مناسبت سے ہمارے سکول میں ایک شاندار تقریب کا انعقاد کیا گیا، جس میں طلبا، اساتذہ اور والدین نے بھرپور شرکت کی۔ تقریب کا مقصد حب الوطنی کے جذبے کو اجاگر کرنا اور پاکستان کی آزادی کی اہمیت کو اجناس کرنا تھا۔

تقریب کا آغاز تلاوتِ قرآنِ پاک سے کیا گیا، جس کے بعد پورے احترام کے ساتھ قومی ترانہ پڑھا گیا۔ تمام طلبا اور اساتذہ احترام کے ساتھ کھڑے ہوئے اور پاکستان زندہ باد کے نعروں سے فضا کو گونجایا۔

تقریری مقابلے کا انعقاد کیا گیا، جس میں طلبا نے "پاکستان کی آزادی – قربانیوں کی داستان”، "14 اگست – آزادی کا پیغام”، اور "ہماری ذمہ داریاں” جیسے موضوعات پر مدلل گفتگو کی۔ طلبا نے آزادی کے حصول میں قائداعظم محمد علی جناح، علامہ اقبال اور دیگر رہنماؤں کی قربانیوں پر روشنی ڈالی۔

ایک  طالب علم نے تقریر کرتے ہوئے کہا کہا:
"یہ آزادی ہمیں تحفے میں نہیں ملی بلکہ اس کے پیچھے لاکھوں قربانیاں ہیں، جنہیں ہمیں کبھی فراموش نہیں کرنا چاہیے۔ یہ تقاریر حب الوطنی کے جذبات کو مزید بڑھانے کا سبب بنیں۔

تقریب میں ملی نغمے بھی پیش کیے گئے، جن میں "دل دل پاکستان”، "سوہنی دھرتی”، اور "ہم زندہ قوم ہیں” جیسے نغمے شامل تھے۔ ہر ملی نغمے پر حاضرین نے خوب تالیاں بجائیں اور پاکستان کے لیے اپنی محبت کا اظہار کیا۔

طلبا نے ایک ٹیبلو پیش کیا، جس میں 1947ء کی جدوجہدِ آزادی کے مناظر دکھائے گئے۔ اس میں مہاجرین کی قربانیوں اور پاکستان کے قیام کے تاریخی لمحات کو پیش کیا گیا۔ طلبا نے قائداعظم کا کردار بھی ادا کیا، جسے دیکھ کر سب نے خوب داد دی۔

سکول کے پرنسپل اور مہمانِ خصوصی نے پاکستان کا پرچم بلند کیا۔ جیسے ہی پرچم فضا میں بلند ہوا، سب نے کھڑے ہو کر پاکستان زندہ باد کے نعرے لگائے۔ فضا حب الوطنی کے جذبات سے بھر گئی۔

مہمانِ خصوصی نے اپنے خطاب میں کہا:

"آزادی بہت بڑی نعمت ہے، جس کی قدر کرنی چاہیے۔ ہمیں اپنی نسلوں کو یہ سکھانا ہوگا کہ آزادی صرف منانے کا دن نہیں، بلکہ اس کی حفاظت اور ترقی کے لیے کام کرنے کا عزم بھی کرنا چاہیے۔”

انہوں نے طلبا کو مشورہ دیا کہ وہ تعلیم اور محنت کے ذریعے پاکستان کی ترقی میں اپنا کردار ادا کریں۔

تقریب کے آخر میں پاکستان کی سلامتی، استحکام اور خوشحالی کے لیے دعا کی گئی۔ اساتذہ نے طلبا کو ہدایت دی کہ وہ ملک کی ترقی، یکجہتی اور امن کے لیے ہمیشہ کام کریں۔ اس عہد کے ساتھ تقریب کا اختتام ہوا کہ پاکستان کو ایک عظیم ملک بنانے کے لیے ہر ممکن کوشش کی جائے گی۔